Tuesday, December 2, 2008

BAHUL TOKOU 2 (PANTUN)

Duvo tontolu pirit
Nisuvang sid pompo
Isai ma monoririt
Ong sondopo ot poriling

Harati dau= Siapalah yang pandang orang yang hodoh.

Karaban pinirompok
Vulu pinopirad
Pagon inan korompok
Ong ginavo po kirad

Harati dau= Walaupun tdk sebanding dari segi paras rupa atau harta, yang penting diri berkualiti ( rajin, berpelajaran, kibahazan dll)


Tunga tunga olungan
Tunga pinitounan
Ombo toun kavagu
Tungagon ku yolungan

Harati Dau : Amu po Nilaan.. hahaha

Sumber Maklumat : Jahudi Masilun, Lahad Datu-Kg.Indarason Darat, Kudat.

Wednesday, November 26, 2008

BAHUL TOKOU (PANTUN)

Hodi apui sid tupak
mindarapit binandak
kada oku ropitai
tu inizo binandak

(Harati: kadan no momoros do karaatan dot ulun vokon ong inizo ot kobuatano)

Indaravos do napu
tokulambai do tindou
indaravos okoi no,
nga sumuhut okoi talambi

(Harati: Mulong ko mosikim okoi diti topot obinsuhut okoi do hoturan)

Ginturus ku ginturus
ginturus panapaan,
nokoginturus oku,
tu livotung o ngaran ku

(Harati: Ondu dit baiko kolunduo dit kusai ot suhuton topot ong i guvas di kusai amu kenginan)

Sumber: Bahan yang sedang dalam peringkat penerbitan oleh sekumpulan penulis Rungus.

Sumber Maklumat : Paul Porodong

Tuesday, November 25, 2008

ASO SAKAG BULAVAN

Aso roitan diti dot
Sakag bulavan ot guvas,

Nga varo roitan tongaki dot
Nobulavan ot bahazan,

Sakag tokou do nobulavan ot bahazan,
Ranzato tokou ot
Ompiling koposizan do kibahazan..
Kada tokou pongupus bahazan
Sinanda-kalzamata


Tungag om mitungang tokou...
Posik om miposik tokou..

Kambai mikakambai tokou..
Potonguso tokou iti koposizan...
Iduai tokou ti gampasi
Yad kumangkam sid rondom..


It gampasi diti
Dot nindasakan dot bahazan..

Surung rumuvab limpak bahazan..
Surung sunduvan jongis
Rurungan di rungsud....



Rinai'it dih Bobohizan Momogunology

Thursday, November 20, 2008

MOMOGUN NUNUK RAGANG

Ahandaman tokou i tangon di aki odu, 
Pinosusui ontok sakag sakavi,
Varo iso nunuk tagazo,
Nunuk taragang sid Nunuk Ragang,
Sinumuni sid tanga lobong di' Aki Nunuk Ragang

Ong suhuton nopo iri susuzan,
I nunuk ogii nopo ra'an,
Momuraha iadko raha dot ulun,
Nunuk,nakagamut sid sungkad tana,
Nakaraan om nokogirot,
Sid pialatan kogibangan om kavananan,
Pungaranan Bavang Livogu

Aki Nunuk Ragang bobolizan tosundu,
Ki t'anak tolu kusai,
I Aki Rungsud, Aki Longuvai om Aki Turumpok,
Minihas tuh boros dot rundukan,
Sakavi i bavang antad sid burul,
Sino' oku, Lumaag minamangun,
Po murinait noh om rumikot oku..

I Aki Rungsud sid Pompod Tana,
Aki Longuvai napalid sid Pinampang,
Iso poh i Aki Turumpok,
Tandon Tongkob sid Nunuk Ragang,
Ioti noh tolu miobpinai,
Inantadon dot momogun tokou,

Sundung kotongkop pinomorunan,
Aa' handaman dahai ika oi Nunuk Ragang,
Tangon gulu amu dahai olingan,
Sunduvon gulu soluhuton vagu,
Tuh koposizan dahai poinsirili dika,
Kalangadan dahai tikid tadau,
Oulit koposizon iadko dii kodori,

Minihas notongkop pogun diti,
Om siratai noh posorili,
Iri momogun natagak noh tinaru,
Tokou sumuni om t'anganak vagu,
Ihimo tokou noh ralan di' gulu,
Potulid vagu miampai kapasi,
Gisom tungkus monungkus i ranzat,

Rinait di':
Masnah Talu (Noy Arscela)

RUMANDAVI OM YI ONGKOL-ONGKOL

Kada tokou pi-inum suvab-suvab 
Tu inono ot kotohok dot bahazan..
Otohok nopo bahazan yadko 
It dangol dot aso ot ulu,,
Kukuro kapal lampanit 
Aso tulun soumul-umul 
Manangkakamot dangol bulzapang...

Bahazan yadko ulu do dangol.. 
Dangol ulu dot inorusan, 
Ringil tarom momingkal pampang..,
Tanak nopo dot rumandavi 
Mangarus tulu dangol om mangasa 
Do ringil do dangol..
Tu dangol nopo di'usan-usan rumandavi 
Inorusan yad ko alzus dot bulzuntung.. 
Tu avan no ot Kapo-kapozon..
Inono it avanus ot piabil-abil..

Nga podi nopo dot mato.. 
Nosisiat dot vudsa diongkol-ongkol..
Dangol nopo di'ongkol-ongkol 
Kiangkap dot apapag nga 
Dazap ot piabil-abil..
Karab sino siti, 
Kurab sombo-sopi, 
Vaig tanau mosin, 
Nalagit kapoi-kapoi... 
Tohok vakas Bahazan.. 
Tilib tongus togulalak

Ka ka no po dino

Onoooooooooooooooooooooo
Ka dit tatangonon kodori


Rinait dih Joe Byne from Momogunology


Tuesday, November 4, 2008

YOKU NOH OH ENUVUNG RUNGUS





Songkuro pongingi-ngimot nu doho o Anakvagu..
Yoku noh enuvung dikou, o enuvung do rungus,
Kumovili kopo ma nga kakali mimpupu ko doho
Okuro ong opondou po mah o mato, tu..
Binahang vuros om tinan ku banal ko mad ko saramin



Kadungko mamanu oku,
Ihtokis ku no iti hakodku om tinanku
Supaya amu imot oku tulun
Sabab ih korondovionku banal ko a'kirad mad ko ulun vokon
Om inurug oku dih Aman(Kinoringan) yadkiti kuasa  
Bang mamanau oku pointongkop pomogunan mad no ko gonit
Ih lapap hakodku mad ko Momoris
Mongking-longking iti Lungkaki hakodku
Kadung manau-panau sid putanaon..


Soira oku poinsamung di riniba po mah vokon
Higilan ku no arong iti vurosku,
Gumikol oku noh sid ongo avu,
Om arabanku noh iti tobuk ku do hogis
Supaya kamung oku dioti, 
Bang tumulung oku no di kosusaan diti bangsa ku
Dit soira do monombitil..
Lagkason ku no iti tinimbuku tobuk ku
Poinsakai no iti tobuku ku tu otohugi barat
Pointongkop no iti tobuku ku sid putanaon
Poinsuni no oh tanom do kakanan di bangsa ku
Oh Bangsaku.. Onuvo dikou
Songkuru ruol po ma topot ih ranzatku amu munso



Poingkuro po mah dot Enuvung oku poh ma
Topot ih ginavo ku, ih guvasku mintadua
Sid Minamang'un diti pomogunan
Oh inono i kinoringan di kumuasa sokoviai
Tu yi Aman no minongurug doho..
Ino pogi...
Iti sukud ku itahak ku sidi Aman
Iti tinan ku bangsa ku no sanganu
Ong ih buntung sumanganu doho tu ih samodku sid bangsaku,
Hondomo okuno dikou sampai a'tanus iti pomogunan..



Rinait Enuvung Manisa